هذا النموذج الخاص بالتواصل عبر العياده وعمرو فيسبوك والحجز او الاستشاره من خلال هذه الاستماره الالكترونيه/2022

لو ميعاد ولادتك قرب أو لسه والده، فالبوست ده مخصوص ليكي:

- وانتي رايحه المستشفي للولاده لازم يبقي شنطتك فيها الحاجات دي: حفاضات مقاس حديثي الولاده، ازازة شامبو صغيره، هدوم للبيبي، بطانيه (ان هاتولدي في الشتا ) او كوفرته قطن ان (هاتولدي في الصيف)، جوانتي وشراب وده لان الطفل بيتولد أطرافه ساقعه وببرونه احتياطي ويفضل الشنطه دي تبقي جاهزه من اول يوم في التاسع لانك ساعة الولاده مش هاتقدري تجهزي الحاجات دي.

- أدوية مهمه لازم تبقي معاكي: قطرة العين زي توبريكس أو سيانارو ودي بتستخدميها للطفل لمدة 5 ايام بعد الولاده، دوا للمغص زي دنتينوكس او سايمثكون،فيتامين (د) زي قطارة في دروب ودي هاتستخدميها يوميا خصوصا ان بترضعي طبيعي، كحول تطهير للحبل السري وهاتطهري بيه الحبل السري مع كل غيار زي كوردو سبراي، كريم مرطب لمكان الحفاض زي زينك أوليف وأخيرا كريم مرطب للجسم زي أفيينو أو جونسون.

- لازم تتأكدي بعد الولاده ان الطفل خد تطعيم الالتهاب الكبدي الوبائي (ب) وده لازم يتاخد في خلال 24 ساعه بعد الولاده ومستشفيات ولاده كتير متوفر فيها.

- لازم تبقي عارفه وزن و طول الطفل ساعة الولاده عشان بعد كده نقدر نتابع نمو الطفل ونقارنه بوقت الولاده وده مهم جدا.

- بلاش أي زحمه و زيارات كتير وشيل للطفل من اكتر من حد لان مناعته في الوقت ده ضعيفه وده ممكن يعرضه لعدوي.

- لازم تبدأي رضاعه طبيعيه في الساعه الذهبيه، وهي أول ساعه بعد الولاده، دي أغلي هديه ممكن تقدميها لطفلك، والرضاعه تكون من الناحيتين بالتبادل، كل ناحيه حوالي ربع ساعه.

- ما تقلقيش لو حسيتي ان مفيش لبن نازل للطفل، هو فيه، بس كميه قليله حوالي 60 مل في أول يومين أو تلاته وماتحاوليش تتأكدي فيه لبن نازل ولا لأ عشان ماتضيعيش الكميه دي لأنها علي الرغم من قلتها إلا إنها مفيده جدااا للطفل ودي اللي بنقول عليها السرسوب.

- اللبن هايبدأ إفرازه من اليوم التالت وهاتحسي بكده

- بعد كل رضعه شيلي الطفل في وضع رأسي وخبطي علي ظهره عشان الهوا اللي خده مع الرضاعه يخرج (التكريع)، لأن ممكن يسببله مغص.

- اتأكدي ان الطفل بيعمل بول وبراز بصورة طبيعيه، وعادي ان البراز في الأول يبقي لونه غامق، وبعد كده هايتحول لفاتح.

- بلاش نلبس الأطفال طبقات لبس كتير بدافع الخوف عليهم، ده ممكن يضرهم، واستخدمي القاعده دي في اللبس ( عدد طبقات لبسك + طبقة زياده)

- أكلك مهم جدا لأن أكلك هو أكله، والعناصر اللي في أكلك هي اللي هاتنزل في اللبن، تجنبي كل حاجه ممكن تعمل مغص وانتفاخات وركزي علي السوايل والعصاير والفواكه والخضار والبروتين ، وماتنسيش المكسرات لأنها مفيده جدا.

- ماتنسيش عند عمر ٣ ايام تطعيم الدرن اللي بيتاخد في الكتف الشمال وكمان عينة الكعب عشان تحليل الغده.

- الحبل السري هايقع لوحده عند ٥ الي ٧ أيام، طبيعي يبدأ ينشف و لونه يغمق

وإن ماوقعش بعد أسبوع ماتقلقيش، ممكن يطول شويه لحد قرب شهر.

- الأريفه، الزن، عدم انتظام النوم، القشط، التحزيقه، الفزه (الخضه)، الخنفره كل ده طبيعي جدا في طفل حديث الولاده.

- يفضل نوم الطفل علي ظهره، وفي حالة وضع الطفل علي بطنه لازم يكون صاحي وعينك عليه كويس لأنه لسه مش قادر يرفع راسه وممكن تنفسه يتأثر لا قدر الله.

- ظهور اصفرار بسيط في العين او الجلد عاليوم التالت طبيعي، دي اسمها صفرا فسيولوجيه ودي طبيعيه تماما وغالبا بتنتهي عاليوم السابع والرضاعه الطبيعيه بتساعد علي انتهاءها وماتقلقيش طالما مابتزيدش ولا معاها اعراض اخري زي تغيير لون البول او البراز مثلا.

طفلك هو أغلي هديه ربنا اداهالك وتستاهل منك تتعبي عشانها. شاركي البوست مع كل حد تعرفيه ممكن يستفيد منه واعملي لايك للصفحة علشان يوصلك كل جديد